1.
Adóro te, devóte, látens déitas,
quæ sub his figúris vere látitas.
Tibi se cor meum totum súbiicit,
quia te contémplans totum déficit.
2. Visus, tactus, gustus in te fállitur,
sed audítu solo tuto créditur;
credo quidquid dixit Dei Fílius:
nil hoc verbo veritátis vérius.
3. In Cruce latébat sola déitas,
at hic latet simul et humánitas;
ambo tamen crédens atque cónfitens,
peto quod petívit latro pœnitens.
4. Plagas, sicut Thómas, non intúeor,
Deum tamen meum te confíteor;
fac me tibi semper magis crédere,
in te spem habére, te dilígere.
5. O memoriále mortis Dómini!
Panis vivus, vitam præstans hómini;
præsta meæ menti de te vívere,
et te illi semper dulce sápere.
6. Pie pellicáne, Iesu Dómine,
me immundum munda tuo sánguine:
cuius una stilla salvum fácere
totum mundum quit ab omni scélere.
7. Iesu, quem velátum nunc aspício,
oro, fiat illud quod tam sítio;
ut te reveláta cernens fácie,
visu sim beátus tuæ gloriæ.
Amen.